Kathir2016

ജൈവ കീടനിയന്ത്രണ മാർഗ്ഗങ്ങൾ

  ജൈവ കൃഷിക്ക് പ്രാധാന്യമെറുന്ന ഈ കാലത്ത് ,വീട്ടിൽ വളരെ എളുപ്പത്തിൽ ഉണ്ടാക്കി ഉപയോഗിക്കാവുന്ന കീടനാശിനികളാണ് താഴെ പറയുന്നവ

 

1.  വെളുത്തുള്ളി മുളക് സത്ത്

വെളുത്തുള്ളി -50 ഗ്രാം

പച്ചമുളക് -25 ഗ്രാം

ഇഞ്ചി -50 ഗ്രാം

വെളുത്തുള്ളി 50 ഗ്രാം ,100 മി .ലിറ്റർ വെള്ളത്തിൽ കുതിർക്കുക .അടുത്ത ദിവസം വെളുത്തുള്ളി തൊലി കളഞ്ഞത് അരച്ച് പേസ്റ്റ് ആക്കുക . ഇതുപോലെ മുളക് 25 ഗ്രാം 50 മി .ലിറ്റർ വെള്ളത്തിലും ഇഞ്ചി 50 ഗ്രാം 100 മി . ലിറ്റർ വെള്ളത്തിലും അരച്ച് പേസ്റ്റ് ആക്കി മൂന്നും കൂടി 3 ലിറ്റർ വെള്ളത്തിൽ ചേർത്ത് ഇളക്കി അരിച്ചു തളിക്കുക . ഇത് കായീച്ച , തണ്ടുത്തുരപ്പൻ , ഇലച്ചാടികൾ , പുഴുക്കൾ എന്നിവയെ നിയന്ത്രിക്കും .

 

2. പപ്പായ ഇലസത്ത്

100 മി . ലിറ്റർ വെള്ളത്തിൽ 50 ഗ്രാം നുറുക്കിയ പപ്പായ ഇല മുക്കി ഒരു രാത്രി ഇട്ടു വയ്ക്കുക . അടുത്ത ദിവസം ഞെരടിപിഴിഞ്ഞെടുത്ത ഇല സത്ത് നാലിരട്ടി വെള്ളം ചേർത്ത് തളിക്കുക . ഇലതീനി പുഴുക്കളെ അകറ്റാൻ ഇത് ഫലപ്രദമാകും .

 

3. ഗോമൂത്രം കാ‍ന്താരി മുളക് മിശ്രിതം

ഒരു കൈ നിറയെ കാ‍ന്താരി മുളക് അരച്ച് ഒരു ലിറ്റർ ഗോമൂത്രത്തിൽ ചേർത്ത് അരിച്ചെടുക്കുക . ഇതിൽ 60 ഗ്രാം ബാർ സോപ്പ് ലയിപ്പിക്കുക . ഈ മിശ്രിതം 10 ലിറ്റർ വെള്ളത്തിൽ നേർപ്പിച്ച് മൃദുല ശരീരികളായ കീടങ്ങൾക്കെതിരെ ഉപയോഗിക്കാം .

 

4. വേപ്പിൻ കഷായം

100 ഗ്രാം വേപ്പില 5 ലിറ്റർ വെള്ളത്തിൽ തളപ്പിച്ച് , തണുത്തതിനു ശേഷം ചെടികളിൽ തളിച്ച് കൊടുക്കാം . വെണ്ട , വഴുതന തുടങ്ങിയ വിളകളിൽ നടുന്നതിന് ഒരാഴ്ച മുൻപ് തുടങ്ങി വേപ്പില ചേർത്ത വെള്ളമൊഴിച്ച് കൊടുക്കുന്നത് നീമാവിരകളെ ഒരു പരിധി വരെ നിയന്ത്രിക്കും .

 

5. പുകയില കഷായം

പുകയില  - 250 ഗ്രാം

ബാർസോപ്പ്‌ - 60 ഗ്രാം

വെള്ളം - 2.25 ലിറ്റർ

250 ഗ്രാം പുകയില ചെറുതായി അറിഞ്ഞ രണ്ടേക്കാൽ ലിറ്റർ വെള്ളത്തിൽ കുതിർത്ത് ഒരു ദിവസം വയ്ക്കുക . അതിനുശേഷം പുകയില കഷണങ്ങൾ പിഴിഞ്ഞ് ചണ്ടി മാറ്റുക . 60 ഗ്രാം ബാർസോപ്പ്‌ ചെറിയ കഷണങ്ങളാക്കി കാൽ ലിറ്റർ വെള്ളത്തിൽ ലയിപ്പിക്കുക . സോപ്പ് ലായിനി പുകയില കഷായവുമായി നന്നായി ലയിപ്പിക്കുക . ഈ ലായിനി അരിച്ചെടുത്ത് ഏഴിരട്ടി വെള്ളം ചേർത്ത് ചെടികളിൽ തളിക്കാം . മുഞ്ഞ , മീലിമുട്ട , ശൽക്കകീടം തുടങ്ങി ഒട്ടേറെ മൃദുല ശരീരികളായ കീടങ്ങളെ നിയന്ത്രിക്കുനതിനു ഇത് ഉപയോഗിക്കാവുന്നതാണ് .

 

6. വേപ്പെണ്ണ വെളുത്തുള്ളി മിശ്രിതം

ഒരു ലിറ്റർ വെള്ളത്തിൽ 5 ഗ്രാം ബാർസോപ്പ്‌ ലയിപ്പിക്കുക ഇതിൽ 20 ഗ്രാം തൊലി കളഞ്ഞ വെളുത്തുള്ളി അരച്ച് നീരെടുത്ത് ചേർക്കുക . 20 മി. ലിറ്റർ വേപ്പെണ്ണയും കൂടി ഇതിൽ ചേർത്ത് നന്നായി യോജിപ്പിച്ച് പച്ചക്കറി വിളകളിലെ നീരൂറ്റി കുടിക്കുന്ന കീടങ്ങൾ ക്കെതിരെ തളിക്കാം .

 

7. വേപ്പെണ്ണ എമൽഷൻ

വേപ്പെണ്ണ - 1 ലിറ്റർ

ബാർസോപ്പ്‌ - 60 ഗ്രാം

വെള്ളം - 15 ലിറ്റർ

60 ഗ്രാം ബാര്സോപ്പ് അര ലിറ്റർ വെള്ളത്തിൽ ലയിപ്പിച്ച ലായിനി ഒരു ലിറ്റർ വേപ്പെണ്ണയിൽ ചേർത്ത് ഇളക്കുക . ഇത് പത്തിരട്ടി വെള്ളത്തിൽ (15 ലിറ്റർ) ചേർത്ത് പയറിനെ ആക്രമിക്കുന്ന ചിത്രകീടം , പേനുകൾ എന്നിവയ്ക്കെതിരായി തളിക്കാം . ലായിനി ചെടികളിൽ നന്നായി പിടിചിരിക്കുന്നതിനും വ്യാപിക്കുന്നതിനും സോപ്പ് സഹായിക്കുന്നു . ലായിനി ഇരുപത് ഇരട്ടി വെള്ളം ചേർത്ത് പാവൽ, പടവലം മുതലായവകളിൽ നീരുറ്റി കുടിക്കുന്ന കീടങ്ങൾ ഇല കാർന്ന് തിന്നുന്ന പുഴുക്കൾ , വണ്ടുകൾ എന്നിവയ്ക്കെതിരെ പ്രയോഗിക്കാം .